ក្ដៅៗ! ពេលនេះ តុលាការសម្រេចផ្តន្ទាទោស William Guang ជាប់គុ..ក ៩ ឆ្នាំ និង សំណងរាប់លានរៀល…
សាលាដំបូងរាជធានីភ្នំពេញ នៅព្រឹកថ្ងៃទី ២ ខែសីហា ឆ្នាំ ២០២២ បានចេញលាសក្រមសម្រេចផ្តន្ទាទោស ឈ្មោះ William Guang អាយុ៣៩ឆ្នាំ ដាក់ពន្ធនាគារកំណត់ចំនួន៩ឆ្នាំ ពីបទ «លួចមានស្ថានទម្ងន់ទោស ប្រើប្រាស់អាវុធខុសច្បាប់ និងពីបទក្លែងឯកសារសាធារណ:» លើសំណុំរឿងប្លន់នៅផ្ទះអ្នកលក់ឡេ អ៊ាន សៀវម៉ី កាលពីថ្ងៃទី១៩ ខែធ្នូ ឆ្នាំ២០២១។
សាលក្រមរបស់សាលាដំបូងរាជធានីភ្នំពេញដដែលនេះបានបង្ហាញឱ្យឃើញថា ក្រៅពីមេចោរ William Guang ដែលត្រូវជាប់ពន្ធនាគារ ៩ ឆ្នាំហើយនោះ ក្នុងនោះបក្ខពួកចំនួន ៦ នាក់ផ្សេងទៀតក៏បានកំណត់ទោសដូចជា ៖ បុរសចំនួន ៤ នាក់ ម្នាក់ៗកំណត់ ៨ ឆ្នាំ និង ស្ត្រី ២ នាក់ ម្នាក់ៗចំនួន ៦ ឆ្នាំ ពីបទ «ផ្សំគំនិតលួចមានស្ថានទម្ងន់ទោស» និង ពីបទ «ប្រើប្រាស់ឯកសារសាធារណ:ក្លែង» និង បុរសម្នាក់ទៀតឈ្មោះ ម៉ាច ដែលបានរត់គេចខ្លួន ត្រូវបានតុលាការចេញដីកាបង្គាប់ឱ្យតាមចាប់យកមកអនុវត្តទោសកំណត់ ៦ ឆ្នាំ។
ក្រៅពីទោសជាប់ពន្ធនាគារ សាលក្រមខាងលើក៏បានសម្រេចឱ្យក្រុមជនជាប់ចោទនេះ រួមគ្នាសងទឹកប្រាក់ចំនួន ៥០ ម៉ឺនដុល្លារទៅឱ្យដើមបណ្តឹង និង សងសំណងជំងឺចិត្តចំនួន ២០០ លានរៀលផងដែរ។
គួរបញ្ជាក់ផងដែរថា ករណីប្លន់ផ្ទះអ្នកលក់ឡេអនឡាញ អ៊ាន សៀវម៉ី បានកើតឡើងកាលពីវេលាម៉ោង១០ និង ៤០នាទី ថ្ងៃទី ១៩ ខែធ្នូ ឆ្នាំ២០២១ ដែលក្រុមចោរមានគ្នា ៥ នាក់ ប្រដាប់ដោយអាវុធគ្រប់ដៃ និង យកបានគ្រឿងពេជ្រទៅមួយចំនួន គេចខ្លួនបានត្រឹមតែមួយយប់ ក៏ត្រូវបានអាវុធហត្ថរាជធានីភ្នំពេញ ក្រោមការដឹកនាំបញ្ជាផ្ទាល់ពីសំណាក់លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងអាវុធហត្ថលើផ្ទៃប្រទេស និងជាមេបញ្ជាការអាវុធហត្ថរាជធានីភ្នំពេញ បង្ក្រាបបាន៕
Comments are closed, but trackbacks and pingbacks are open.