អ៊ុយក្រែន ប្រកាសដាច់ខាត មិនប្រគល់ទឹកដីដើម្បីបញ្ចប់ជម្លោះជាមួយរុស្ស៊ីឡើយ
លោកប្រធានាធិបតី អ៊ុយក្រែន Volodymyr Zelensky និយាយថា លោកនឹងមិនបោះបង់ដែនដីភាគខាងកើតប្រទេស ដើម្បីដោះដូរការបញ្ចប់ជម្លោះជាមួយនឹងរុស្ស៊ីនោះឡើយ រួមទាំងបញ្ជាក់បន្ថែមថា អ៊ុយក្រែន គឺត្រៀមខ្លួនរួចស្រេចសម្រាប់ការធ្វើសង្គ្រាមនៅតំបន់ Donbass។
ថ្លែងក្នុងកិច្ចសម្ភាសជាមួយសារព័ត៌មាន CNN កាលពីចុងសប្ដាហ៍កន្លងទៅ លោកប្រធានាធិបតីអ៊ុយក្រែនរូបនេះបាននិយាយថា ៖ «វាគឺសំខាន់ខ្លាំងណាស់សម្រាប់យើង ដែលមិនត្រូវអនុញ្ញាតឱ្យពួកគេមកគ្រប់គ្រង និង ឈរជើងលើកន្លែងយើងបាន ព្រោះថាការប្រយុទ្ធមួយនេះ អាចប៉ះពាល់ដំណើរនៃសង្គ្រាមទាំងមូល»។
លោកប្រធានាធិបតី Zelensky បានបន្ថែមទៀតថា គ្មានការធានាណាមួយថា កងទ័ពរុស្ស៊ីនឹងមិនព្យាយាមកាន់កាប់ទីក្រុង គៀវ ម្ដងទៀតនោះទេ ប្រសិនបើពួកគេគ្រប់គ្រងតំបន់ Donbass បាននោះ។
ក្នុងនោះដែរ លោកប្រធានាធិបតីអ៊ុយក្រែន ក៏បានដាក់ការព្រមានពីលទ្ធភាពដែលរុស្ស៊ីអាចនឹងប្រើប្រាស់អាវុធនុយក្លេអ៊ែរខ្នាតតូចសម្រាប់សង្គ្រាម ហើយលោកក៏បានធ្វើការអំពាវនាវសុំជំនួយកងទ័ព ដើម្បីទប់ទល់នឹងរុស្ស៊ីនៅតំបន់ភាគខាងកើត និង ខាងត្បូងប្រទេស។
គួរឱ្យដឹងថា ប្រទេសរុស្ស៊ី និង អ៊ុយក្រែន បានឆ្លងកាត់ការចរចាសន្តិភាពជាច្រើនលើកហើយដែរ ទាំងការចរចាទល់មុខគ្នា និង តាមទម្រង់អនឡាញនានា ប៉ុន្តែនៅតែមិនទាន់ត្រូវរ៉ូវគ្នាលើបទឈប់បាញ់នោះឡើយ៕
Comments are closed, but trackbacks and pingbacks are open.