លែងបារម្ភរឿងផ្លូវមិនស្រួលទៀតហើយ! ពេលនេះផ្លូវជាតិលេខ ៣ លែងមានបញ្ហាកកស្ទះទៀតហើយ ដោយសារតែផ្លូវនេះសម្រេចបានដោយចាក់កៅស៊ូ AC រហូតដល់ទៅ
ពីមុនគេធ្វើមិនទាន់ហើយ ជិះក៏ពិបាក ហើយថែមទាំងហុយដីពេញហ្នឹង ប៉ុន្តែនៅពេលនេះកំណាត់ផ្លូវជាតិលេខ ៣ ពីចោមចៅដល់ក្រុងកំពត
សម្រេចការសាងសង់បាន ៩៨ ភាគរយ។ នេះបើតាមលោកហ៊ាង សុទ្ធាយុត្តិ បានថ្លែងប្រាប់កម្ពុជាថ្មីកាលពីរសៀលម្សិលមិញនេះ។
លោក ហ៊ាង សុទ្ធាយុត្តិ អ្នកនាំពាក្យនិងជាប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ នៃក្រសួងសាធារណការ និងដឹកជញ្ជូនបានឲ្យដឹងថា
«កំណាត់ផ្លូវជាតិ ៣ ប្រវែង ១៣៥ គីឡូម៉ែត្រ ត្រូវបានស្ថាបនាឡើងដោយគិតគូរខ្ពស់លើគុណភាព សោភ័ណភាព និងសុវត្ថិភាពសម្រាប់អ្នកប្រើប្រាស់ដងផ្លូវ។
ផ្លូវនេះត្រូវបានសាងសង់ ដោយមានសួនពុះកណ្ដាលទ្រូងផ្លូវពីចោមចៅទៅដល់បែកគូស បែងចែកចរាចរណ៍ទាំងពីរទិស សម្រួលការធ្វើដំណើរ កាត់បន្ថយការគ្រោះថ្នាក់។
នៅលើផ្លូវនេះមានបំពាក់ជញ្ជីងថ្លឹងរថយន្តទាំងក្រោមដី (High Speed) និងតាមស្ថានីយ (Low Speed) ដើម្បីការពារការដឹកលើសទម្ងន់ រួមទាំងកាមេរ៉ាចាប់ល្បឿនសម្រាប់ត្រួតពិនិត្យការបើកបរលើសល្បឿនកំណត់»។
លោកហ៊ាង សុទ្ធាយុត្តិ បន្តថា «ការស្ថាបនាផ្លូវនេះយកចិត្តទុកដាក់លើបច្ចេកទេសគុណភាព ព្រោះជាផ្លូវដ៏សំខាន់សម្រាប់បម្រើវិស័យទេសចរណ៍ទៅខេត្តកំពត
ខណៈលើកំណាត់ផ្លូវនេះក៏មានរោងចក្រសហគ្រាសយ៉ាងច្រើន ត្រូវបានពង្រីកធំទូលាយ ជួយបង្កើនប្រសិទ្ធភាពក្នុងការដឹកជញ្ជូនផលិតផលទៅកាន់ទីផ្សារបានឆាប់រហ័ស ជាពិសេសភ្ជាប់ទៅកាន់កំពង់ផែទឹកជ្រៅខេត្តព្រះសីហនុ»។
«ការស្ថាបនាផ្លូវជាតិលេខ ៣ ប្រវែងជាង ១៣០ គីឡូម៉ែត្រ ក៏មានរៀបចំចំណតយានយន្តនៅតាមទីប្រជុំជន និងផ្លូវបត់ប្តូរទិស ដែលអាចកាត់បន្ថយការកកស្ទះ»។
គួរបញ្ជាក់ថា ផ្លូវជាតិលេខ៣ មានប្រវែងសរុប ១៣៥ គីឡូម៉ែត្រ ចាប់ពីភ្នំពេញ(ចោមចៅ) ដល់ក្រុងកំពត ដោយឆ្លងកាត់រាជធានីភ្នំពេញប្រវែង ១២គីឡូម៉ែត្រ ខេត្តកណ្តាល ប្រវែង ១១គីឡូម៉ែត្រ
ខេត្តកំពង់ស្ពឺ ប្រវែង ៣០គីឡូម៉ែត្រ ខេត្តតាកែវ ប្រវែង ៣០គីឡូម៉ែត្រ និងខេត្តកំពត ប្រវែង ៥១គីឡូម៉ែត្រ។ ការស្ថាបនាផ្លូវនេះមានពីរកំណាត់ ដោយក្នុងនោះ ប្រវែង៦៩គីឡូម៉ែត្រ
ចាប់ពីចោមចៅ ដល់បែកគុស ត្រូវសាងសង់ជា ៤ គន្លង និងចាប់ពីបែកគូសដល់ទីរួមខេត្តកំពត ប្រវែង ៦៥ គីឡូម៉ែត្រ ត្រូវសាងសង់ជា ២គន្លង ដោយក្រាលបេតុងកៅស៊ូ (AC)។
ការស្ថាបនាផ្លូវនេះប្រើកញ្ចប់ថវិកាប្រមាណជាង ២១៩ លានដុល្លារអាមេរិក ដែលបានបើកការដ្ឋានសាងសង់កាលពីថ្ងៃទី ៧ ខែឧសភា ឆ្នាំ ២០១៨ និងបានបញ្ចប់មុនគម្រោងប្រមាណ ១ ឆ្នាំ អាចរួចរាល់ទាំងស្រុងនាឆ្នាំ២០២១ នេះ៕
Comments are closed, but trackbacks and pingbacks are open.