ប្រធានមន្ទីរសុខាភិបាលរាជធានីភ្នំពេញបញ្ជាក់ពីពេលវេលា និងរឿងដែលត្រូវធ្វើបន្ដ សម្រាប់អ្នកកូវីដ១៩ ព្យាបាលតាមផ្ទះ
កាលពីពេលថ្មីៗកន្លងទៅនេះ ក្រសួងសុខាភិបាលបានសម្រេចអនុញ្ញាតឲ្យអ្នកជំងឺកូវីដ១៩ កម្រិតស្រាលនៅក្នុងមូលដ្ឋានរាជធានីភ្នំពេញ អាចសម្រាកព្យាបាលនៅតាមគេហៈឋានរបស់ខ្លួនបាន ដោយពុំចាំបាច់ទៅសម្រាកនៅមន្ទីរពេទ្យឡើយ។ ដោយការធ្វើបែបនេះ គឺដើម្បីទុកកន្លែងសម្រាកព្យាបាលនៅមន្ទីរពេទ្យជូនអ្នកជំងឺកូវីដ១៩កម្រិតធ្ងន់ធ្ងរ។
ដោយសម្រាប់សម្រាកព្យាបាលដោយខ្លួនឯងនេះ ក្រសួងក៏បានបង្ហាញពីវិធីព្យាបាល និងប្រភេទថ្នាំ ក៏ដូចជាពេលវេលានៃការព្យាបាលផងដែរ។
ដោយក្នុងនោះសម្រាប់អ្នកជំងឺកូវីដ១៩ ដែលពុំមានរោគដូចជា៖ ក្អក ហៀរសំបោរ ឈឺបំពង់ក ពិបាកដកដង្ហើម កំដៅតិចជាង ឬស្មើ ៣៧.៥ អង្សារពុំបាច់ប្រើឱសថព្យាបាលទេ។ ប៉ុន្ដែសម្រាប់អ្នកដែលមានរោគសញ្ញា ក្ដៅខ្លួន ឈឺក្បាល ឈឺបំពង់ក ឈឺសាច់ដុំ ឈឺសន្លាក់ សម្រាប់មនុស្សពេញវ័យ ឬកុមារ ទម្ងន់ចាប់ពី ៣០ គីឡូឡើងទៅ ត្រូវប្រើប្រាស់ថ្នាំ ប៉ារ៉ាសេតាម៉ុល ៥០០ ម.ក្រ ៣ដងក្នុង១ថ្ងៃ។
ដោយឡែកសម្រាប់រោគសញ្ញាតឹងច្រមុះ ផ្ដាសាយ ហៀរសំបោរ មនុស្សពេញវ័យ ឬកុមារអាយុចាប់ពី ៦ ឡើង ប្រើប្រាស់ថ្នាំ ប្រូម៉ិចស៊ីន ៨ ម.ក្រ ៣ដងក្នុង១ថ្ងៃ ឬថ្នាំសេទីរីហ្ស៊ីន ១០ ម.ក្រ ១ដងក្នុង១ថ្ងៃ។ សម្រាប់មនុស្សពេញវ័យ ថ្នាំគ្រាប់ សៀនហ័រ ឈីងវីន (Lianhua Qingwen Capsules) លេប ៤ គ្រាប់ក្នុង ១ ដង និងចំនួន ៣ ដងក្នុង១ថ្ងៃ។
ជាមួយគ្នានេះផងដែរ កាលពីពេលកន្លងទៅថ្មីៗនេះ លោក ងី មានហេង ប្រធានមន្ទីរសុខាភិបាលរាជធានីភ្នំពេញ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ ជុំវិញការត្រួតពិនិត្យ ការផ្តល់ការព្យាបាលអ្នកជំងឺកូវីដ-១៩នៅតាមផ្ទះតាមរយៈ Video Conference កាលពីថ្ងៃម្សិលមិញ ក៏បានពន្យល់ដែលថា ចំពោះអ្នកដែលរកឃើញមានវិជ្ជមានជំងឺកូវីដ-១៩ ហើយស្ម័ក្រចិត្តព្យាបាលតាមផ្ទះ ត្រូវព្យាបាលឱ្យបាន១៣ថ្ងៃ ។ ក្នុងថ្ងៃទី១៣នេះ គ្រូពេទ្យត្រូវទៅយកសំណាកបន្តទៀត ។
នៅពេលពិនិត្យយកសំណាកនោះ បើទោះបីជារកឃើញ ឬរកមិនឃើញជំងឺកូវីដ-១៩ ក៏ដោយ ក៏ត្រូវតែបន្តដាក់ខ្លួនឱ្យនៅដាច់ដោយឡែកចំនួន ១៤ថ្ងៃបន្តទៀត មិនអាចចេញក្រៅបានទេ។ នេះបើយោងតាមការដកស្រង់ពីក្រសួងព័ត៌មាន៕
Comments are closed, but trackbacks and pingbacks are open.