ក្ដៅៗ! រកឃើញ «DELTA» លើក្មេងប្រុសម្នាក់ អាយុទើបតែ ១០ ឆ្នាំ ជាករណីដំបូង ក្នុងខេត្តព្រះសីហនុ
រដ្ឋបាលខេត្តព្រះសីហនុ នៅរសៀលថ្ងៃទី ១២ ខែសីហា ឆ្នាំ ២០២១ នេះ បានចេញសេចក្ដីជូនដំណឹង ស្ដីពីករណីរកឃើញអ្នកវិជ្ជមានជំងឺកូវីដ-១៩ បំប្លែងថ្មីប្រភេទ Delta ជាលើកដំបូងនៅខេត្តព្រះសីហនុ ទៅលើកុមារាម្នាក់ដែលមានអាយុទើបតែ ១០ ឆ្នាំប៉ុណ្ណោះ ។
តាមប្រភពបានឱ្យដឹងថា កុមារាដែលរកឃើញវិជ្ជមាន «DELTA» ខាងលើ បានធ្វើដំណើរត្រឡប់ពីព្រះរាជាណាចក្រថៃ ចូលមកព្រះរាជាណាចក្រកម្ពុជា តាមច្រកឡែម ដោយធ្វើចត្តាឡីស័កនៅខេត្តបន្ទាយមានជ័យ នៅថ្ងៃទី ២ ខែកក្កដា ឆ្នាំ ២០២១ និង បានមកដល់ខេត្តព្រះសីហនុ នៅថ្ងៃទី ៦ ខែសីហា ឆ្នាំ ២០២១ ដោយធ្វើចត្តាឡីស័កនៅអគារព្យាបាលសាកាណា ៣ ។
លុះនៅថ្ងៃទី ៧ ខែសីហា ឆ្នាំ ២០២១ ក្រុមគ្រូពេទ្យបានយកសំណាករបស់ក្មេងប្រុសរូបនេះ បញ្ជូនទៅធ្វើតេស្តវិភាគនៅវិទ្យាស្ថានប៉ាស្ទ័រ ស្រាប់តែទទួលបានលទ្ធផលវិជ្ជមានជំងឺកូវីដ-១៩ បំប្លែងថ្មីប្រភេទ Delta នៅក្នុងថ្ងៃទី ១២ ខែសីហា ឆ្នាំ២០២១ នេះ ។
អាស្រ័យហេតុនេះសូមសាធារណជនទាំងអស់ មេត្តាជ្រាបជាព័ត៌មាន និង បង្កើនការប្រុងប្រយ័ត្នខ្ពស់បំផុត ដោយអនុវត្តឱ្យបានខ្ជាប់ខ្ជួន នូវគោលការណ៍ណែនាំរបស់ក្រសួងសុខាភិបាល និង អនុសាសន៍ ៣ កុំ ៣ ការពារ របស់ប្រមុខរាជរដ្ឋាភិបាលកម្ពុជា ៕
Comments are closed, but trackbacks and pingbacks are open.