លោកជំទាវ ឱ វណ្ណឌីន រដ្ឋលេខាធិការ និង ជាអ្នកនាំពាក្យក្រសួងសុខាភិបាល នៅព្រឹកថ្ងៃទី ១៧ ខែមីនា ឆ្នាំ ២០២២ នេះ បានផ្ដល់ចម្លើយទៅនឹងសំណួរអ្នកសារព័ត៌មានស្តីពីផលប៉ះពាល់សុខភាព ក្រោយពីបានជាសះស្បើយពីជំងឺកូវីដ-១៩។
ក្នុងនោះ មន្ត្រីជាន់ខ្ពស់ក្រសួងសុខាភិបាលរូបនេះបានបញ្ជាក់ជូនថា តាមការសិក្សារបស់អ្នកវិទ្យាសាស្ត្រវេជ្ជសាស្ត្របរទេសលើអ្នកជាសះស្បើយពីជំងឺកូវីដ-១៩ មួយចំនួន គេសង្កេតឃើញថា មានប្រហែលជា ២៣-២៦ % នៃអ្នកជាសះស្បើយ គឺមានបញ្ហាផ្លូវចិត្ត ដូចជាបញ្ហាឆាប់បាក់ទឹកចិត្ត និង ឆាប់ព្រួយ ជាដើម។ ទន្ទឹមនឹងនោះ ភាពឆាប់នឿយហត់ ឬ មានអារម្មណ៍មិនសូវមានកម្លាំងកំហែង ក៏ សង្កេតឃើញមានដែរ និង មួយចំនួនទៀត ក៏មានការឆាប់ទទួលបាននូវការឆ្លងជំងឺកូវីដ-១៩ ឡើងវិញផងដែរ។
លោកជំទាវបានបញ្ជាក់បន្ថែមថា ករណីនេះ អាស្រ័យលើសរីរាង្គរបស់បុគ្គលម្នាក់ៗ ដែលមានការឆ្លើយតប និង ការវិវត្តន៍កើតមានមិនដូចគ្នានោះឡើយ ជាពិសេសស្ថានភាពនៃអង់ទីគ័ររបស់បុគ្គល ឆ្លើយតបទប់ទល់ទៅនឹងជំងឺនេះ ហើយក៏អាស្រ័យលើស្ថានភាពដែលបុគ្គលបានឆ្លងកាត់សភាពជំងឺស្រាល ឬ ជំងឺធ្ងន់ធ្ងរផងដែរ។
ទន្ទឹមនឹងនោះ ការសិក្សាក៏បាន បង្ហាញថា អាចមានរោគសញ្ញាដែលនៅសេសសល់បន្ត ក្នុងរយៈពេលប្រហែលជាមួយឆ្នាំ ក្រោយពីបានជាសះស្បើយពីជំងឺកូវីដ-១៩ (បុគ្គលខ្លះក៏មិនមានបញ្ហានេះដែរ ដែលគេសង្កេតឃើញមានដូចជា ៖ ឆាប់នឿយហត់ ឬ មានអារម្មណ៍ថាដូចជាខ្សោយជាងមុនពេលឈឺ, ដកដង្ហើមដូចជាមិនបានវែងៗ ឬ ពិបាកដកដង្ហើម ឬ មានអារម្មណ៍ថាដូចជារៀងថប់ៗដង្ហើម, បន្តនៅក្អកខ្លះៗ, អាចឈឺសន្លាក់ដៃជើង, អាចមានឈឺដើមទ្រូងខ្លះៗ, មានបញ្ហាការចងចាំ និង បញ្ហាសម្រាន្តមិនសូវលក់, ឈឺសាច់ដុំ ឬ ឈឺក្បាល, បេះដូងដើរញាប់ជាងមុន និង បញ្ហាបាក់ទឹកចិត្ត អស់សង្ឃឹម ឬ មានអារម្មណ៍ព្រួយច្រើន ជាដើម។
យ៉ាងណាមិញ លោកជំទាវបានបញ្ជាក់ឱ្យបានដឹងថា រោគសញ្ញាខាងលើនេះ នឹងប្រហែលជាអាចបាត់ទៅវិញ ក្នុងរយ:ពេល ៦-១២ ខែ ឬ អាចខ្លីជាងនេះ ឬក៏អាចកាន់តែធ្ងន់ធ្ងរ ឬ មិនបាត់ទៅវិញ អាស្រ័យលើការបន្តថែទាំសុខភាពរបស់បុគ្គលដែលបានជាសះស្បើយពីជំងឺកូវីដ-១៩ និង ការធ្វើលំហាត់ប្រាណ ព្រមទាំងការចេះបន្ធូអារម្មណ៍ និង បរិយាកាសរស់នៅ ជាដើម ជាពិសេសចាំបាច់ត្រូវចៀសវាងកុំបណ្ដោយខ្លួនឱ្យមានការឆ្លងកូវីដ-១៩ ឡើងវិញ ដែលវាអាចបន្ថែមភាពប៉ះពាល់មិនល្អដល់សរីរាង្គណាមួយរបស់បុគ្គល ដូចជាប្រព័ន្ធសរសៃប្រសាទ បេះដូង ថ្លើម និង តម្រងនោម ជាដើម៕
ដើម្បីជ្រាបកាន់តែច្បាស់ សូមអានសេចក្ដីលម្អិតនៅខាងក្រោម ៖
Comments are closed, but trackbacks and pingbacks are open.